¡Hablad en cristiano! Procesos de nacionalización llingüística na construcción de los estaos-nación


Pablo Rodríguez Alonso
Batura, 23
ISBN: 978-84-8053-753-7
14 x 21,5 cm || 244 páxs. || PVP: 12 €

Tocante a la diversidá llingüística de la humanidá, l’autor d’esti ensayu parte de dos premises básiques. D’una parte, la esistencia d’infinidá de llingües ye una característica del ser humanu: la glotodiversidá ye lo natural. D’otra, el panorama llingüísticu nunca foi estable, sinón dinámicu: a lo llargo de la historia nacieron y morrieron idiomes. Sicasí, l’actual ritmu de desaniciu ye enforma altu (por exemplu, según dellos llingüistes, el 50 % de les 6.000 llingües del mundu van desapaecer nun sieglu).
Partiendo d’estes dos premises, l’autor tenta nesta obra d’analizar el porqué de la desapaición de les llingües anguaño, qué procesos históricos y sociales tán detrás de la sustitución llingüística y pa ello va exemplificar el procesu de cambiu idiomáticu nos procesos de nacionalización llingüística desarrollaos nel Reinu Xuníu, Francia y España (con especial dedicación al casu del asturianu y ensin escaecer los procesos de castellanización d’América y de les otres colonies). Amás d’ello, descríbese en qué consiste’l procesu de «nacionalización llingüística» y el rol del idioma na construcción de los discursos nacionales o nacionalistes.
Pablo Rodríguez Alonso (Xixón, 1979) ye historiador, ensayista y poeta, amás de profesor interín de Xeografía y Historia en Secundaria y Bachilleratu. Como escritor llíricu ye autor de los poemarios La lluz del nordés (2006) y Pallabres d’un tiempu (2010) colos que ganó los premios «Teodoro Cuesta» 2005 y «Nené Losada Rico» 2010 respectivamente. Nel añu 2011 publica’l trabayu d’investigación histórica De totalitarios a «demócrates». Franquismu, nazismu y fascismu na II Guerra Mundial al traviés del diariu xixonés «Voluntad» (2011), col qu’algamó’l XII Premiu d’Investigación «Rosario de Acuña» y el Premiu de la Crítica de les Lletres Asturianes na modalidá d’ensayu nel añu 2012. Tien, amás, publicaos los artículos «El nacionalismo bretón desde 1945 a la actualidad» na obra recopilatoria de les I Xornaes d’Historia Contemporánea y «La nacionalización llingüística nos estaos-nación: l’exemplu español» nel llibru Teoría e historia de los nacionalismos contemporáneos, entrambos los dos editaos pola Facultá d’Historia de la Universidá asturiana.

Comentarios

Entradas populares